Freiwillige Feuerwehr Buchenberg

Funke-Alarm

Mei Händy plingt und i woiß glei:
Des ka bloß Feier-Alarm sei,
weil mibbe in dr Nacht um oins
mi a-simse, des traut sich koins!

I juck raus aus’m Bett und saus
so schnell wie’s goht zum Feierwehrhaus.
Was i do sieh, kut mr komisch vor:
A paar Feuerwehrler standet vor’m Tor,
koiner macht A’stalte, bigott
dass ma zum Ei’satz ausrucke sott.

Bei jedem Alarm gang i glei na
und lueg z‘erscht des Alarmfax a.
Ratlos kratz i mi am Ohr,
die Meldung kut mr g’spässig vor.
Als Ei‘satzort lies i den Vermerk:
„Feuerwehrgerätehaus Buchenberg“
und als Bemerkung no die Wort:
„Starker Funkenflug, keine Aufsicht vor Ort!“
und was am meiste no verwirrt:
A Polizeistreife hot d’Feierwehr alarmiert.

Dass do Funke rumflieget, isch doch jedem klar,
weil am Obed vorher Funkesonntag war!
Und den Funke zündet, ehrlich wohr,
d’Feierwehr a seit viele Johr!

Immer meh Feierwehrler kommet grennt
und went wisse, was ma helfe kennt.
Dr Kommandant, der rafft sich auf:
„Mir fahret jetzt zum Funke nauf.“

Der Streifewage stoht do eaba
und d’Poliziste glei daneabe.
Sie froget d’Polizei dann glei
wieso denn d’Feierwehr alarmiert wore sei,
der Funke sei schließlich a’gmeldt gwea
nix isch passiert, gar nix isch gscheah
und a paar Feierwehrler im Feierwehrhaus dett
hant des alls unter Kontrolle ghett.
Do brennt au a Licht, do hätt d’Polizei
zescht nochfroge könne vor der Alarmiererei!

Dr Polizist moint bloß u’wirsch:
„Des woiß doch i it, dass des s’Feierwehrhaus isch.
Dr Vorstand rastet jetzt fast aus:
„Ja, sieht des vielleicht wie a Wohnhaus aus?“
Fastgar hätt’r sich vergeassse
und die Poliziste am liebste aufgfreasse!

Den Polizist hört ma narret zenne:
„Vor mir aus ka des scheiß Buecheberg ganz abbrenne!“
Aber für d’Feierwehrler war des fei
a mutwilliger Fehlalarm - von dr Polizei!

Einsatz 10.03.2014
Ernst Wegmann